Nefolitos
I.
Klippe leef stadig
gedagtig aan hul
grootvaders, vulkane
en antieke seebodems.
Miljoene jare se sediment,
die versweë geraamtes
van molluske en korale –
magtige tektoniese kragte in die worp
van kalligrafiese skulpe.
Klippe: chronoloë van die aarde,
die pelgrims van veraf berge. Klippe
is die drome van fossiele, soos
koolstof droom om diamant te word.
II.
Moenie ’n klip omkeer
as jy nie gereed is om
sy bleek diere te aanskou nie.
Miere streep uit
forte en fabrieke, soldate en werkers
monolities ge-bunker
in mos se groen asem.
III.
Nefolitos – wolkklip. Die Chinese
glo dat klippe soos wolke
morf, aan hul wortels ontruk.
Uiteindelik droom
klippe om katedrale te word,
soos katedrale droom
om wolke te word.
© Nini Bennett
Meesterlik!!
Verruklik!!