Madame Curie
(1867 – 1934)
My little Pierre, I want to tell you that the laburnum is in flower, the wisteria, the hawthorn and the iris are beginning. You would have loved it all. – dagboekinskrywing van Marie Curie.
En as die blomgetye in die verleiding
van ’n radioaktiewe winter sterf
verval sy in die energieveld van atome
van radium, polonium en uraan
wat onrustig in die donker glimmer.
Sy onthou die verlore liefde van Żorawski
wat oor haar ewebeeld in Warskou waak.
Maar Maria Skłodowska Curie sal saans
in die korridors van die Sorbonne rondswerf
en in die laboratorium by die Radium-Instituut
sal sy ’n laaste eksperiment uitvoer.
En later, op die plein by Place du Panthéon
waar Paul Langevin ook reeds lankal slaap
sal sy vir ewig in Pierre se arms rus
en hom vertel dat die wisterias weer blom.
© Mellet Moll, 2022