Salvia Ockhuis. Ontydig
Ontydig
Jy het die son
se geel spoor oor blou
noukeurig dopgehou;
jy kon
skadu’s se val vertaal
en só
sekuur die tyd bepaal.
Hier is mense wat glo
hulle weet
elkeen se tyd op aarde
is afgemeet.
Maar my hart sien nou
geen songeel teen die hemelblou –
net skaduwees
wat daglank daal:
jóú tyd is verkeerd gelees,
jy is te vroeg kom haal.
Hierdie gedig – ’n inskrywing vir die jaarlikse AVBOB Poësiekompetisie – is in die AVBOB Poësiebiblioteek gepubliseer, en word herpubliseer met toestemming van die AVBOB Poësieprojek. Klik hier om toegang tot meer as 17 000 gedigte in al 11 amptelike Suid-Afrikaanse tale te kry: https://www.avbobpoetry.co.za/Poem/ViewAll
