Joan Hambidge. Opruiming twaalf

 

Opruiming twaalf

 

Ontdek ‘n asbak van my Oupa Frank, die skilder,

‘n seetoneel met branders en rotse blougrys.

My dowe Oupa altyd tuis gestrand, terwyl sy vrou

seereise na vele eksotiese plekke onderneem.

 

‘n Ontvlugting vir haar uit ‘n ruimte beknop

met jare later se brokstukke van onvervuldheid.

Haar suster se chaperone en agter hulle staan

‘n moeder krities, afbrekend en vol onbegrip.

 

Ons sien in hierdie kernagtige opsomming

iets van my teenstrydige aard: iewers gestrand

teen ‘n kuslyn; andersyds immer aan die beweeg

na verre ruimtes gekoppel aan aflegging.

 

In Puerto Montt of in Santiago de Chili

immer gekonfronteer met ‘n alleenreis

soos die trappe van vergelyking van grys:

grys, gryser, donkerswartste melancholie.

 

© Joan Hambidge, 2022

 

Bookmark and Share

Los kommentaar

 

*