Moerstaāl
Loit Sōls
In Moerstaāl word oorsprong bekyk: geskiedenis, erfenis en taal vloei saam. Loit Sōls skryf oor sy voorsate, die Eerste Inheemse mense aan die suidpunt van Afrika. Nie net die inhoud van sy gedigte nie, maar ook sy woordeskat en skryfwyse word deur die erfenis van sy mense verryk. Só klink Sōls se “skryf-stills” op in ’n betreuring van verlies, maar ook in ’n strewe na behoud.
Die lewegewende moederfiguur staan sentraal in dié bundel. Sy is die vrou wat onderdruk en misken is, en wie se bydrae en plek, soos dié van die taal, deur die gedigte herstel en openbaar word.
Die kermerkende musikaliteit van Sōls se werk, sy skerp ironiese blik en indringende sosiale kommentaar word weer eens voortreflik in Moerstaāl ingespan. Sy eiesoortige idiolek is met die verloop van jare verfyn; dit boei en daag uit in hierdie nuwe bundel “Goema”-gedigte. En sy poëtiese gebruik van spreektaal bereik nuwe hoogtes in sy vyf “praātsies”.
“Soesie krye en plante wat selfs innie dorste omgewings groei, trek dié diep-gewortelde gedigte hulle krag ytie grond. Sōls isse seasoned skrywer in bloom.” – Ronelda S. Kamfer
Oor die skrywer
Loit Sōls is ’n skrywer, aktivis vir moedertaalonderrig, performance-poet, musikant/liedjieskrywer. Hy verpersoonlik Goema en sy Komvandaan: Strandloper, Eerste Inheemse mense, Kaapse Vlakte, en nou die Hessekwa-distrik. Uit sy pen verskyn My straat en anne praat-poems, Die faraway klanke vanne hadeda, asook die boek/CD-stel Serious kak-praat.
[Kwela Boeke 2022. Prys: R225,00. ISBN-13: 9780795710599]