Die Buitgemaakte Staat
In die buitgemaakte staat
hang die boepense
spekvet en gesond
oor die Zondo-kommissie
se bevindings –
‘Geen kommentaar’ sonder ons regsgeleerdes
die – wat die jan-menseman nooit sal kan bekostig
want die onderduimse toesmeerdery
die bietjie vir my
in my eilandsee-rekening
is tog nie iets wat nou opgeskort kan word.
Hierdie pens van my kort restaurantkos
so bietjie Gupta-trots uit die boonste rakke.
En elke aand oefen ek my
die-lewe-is-tog-so-swaar-gelaat
vir die kameras van die buitgemaakte staat.
In die buitgemaakte staat
kry die inkomstediens
nog ʼn beskermingsbevel:
hulle litigeer op grootskaal –
vries die bates,
vries die skurke se knaters
dat die berigte die stof so laat staan.
Die jan-alleman se geld vermors
om die My-Heer, Sy-Edele trawante te verryk
en vra mens agterna het julle die geld teruggekry:
dan is die vrae onvanpas, miskien selfs, disrespekvol.
In die buitgemaakte staat
probeer die tegnologiese feodale
alles wat staat moet bly, privatiseer:
die landbou-grond word opgekoop
verbouingsregte vir die eenwêrelds-
regering se aristokrate
en die rondloperhonde
– tong uit die bek –
pis hulle (af)bakens
oor grens, teen beleid –
In die buitgemaakte staat
blameer almal dit op apartheid
tot doomsday kom
maar tog só lekker is die kapitaal
wat soos hulle bondgenote ook maar sê:
die toekoms van hier mooi (vry?) land is.
In die buitgemaakte staat
dien almal die keiser
die sisteem
van sisteme –
die uiteinde wat soos die vloede elders
laat wonder wie dra by
tot aardsverwarming?
In die buitgemaakte staat
lê die plunder knie-diep
links én regs van die draad
en die Here behoed ons
van die dor-verlatenheid van ouds
wat steeds die oorhand (en onderhand) kry.
In die buitgemaakte wêreld
kan verlossing slegs kom
vir die een wat verstaan
dat die siekte slegs genees kan word
as die siekte in al sy skakerings (h)erken kan word
hokgeslaan kan word deur daardie bok-in-die-hok suiwerste
deeltjie van bewussyn wat spoel om die spil van wat is.
Dis wanneer ʼn buitgemaakte skepsel die leuen besweer
en die buitmakers, uitbuiters, die bloedbroers
geen bestaansreg of -rede meer had.
Daarom bring munte vir die keiser
en kruisig die konings
aan ʼn kruis so hoog –
En wéét die buitgemaakte staat
het soos ʼn apartheidstaat
ʼn raklewe
net soos die eenwêreldsideaal
wat buit kom maak op die
ekonomie se einde
wat – terloops –
dan ook einde se kant toe staan?
Wat sê jy my broer, my dor, verlate staat?
Iets wens dat vryheid weer vir jou beskore is
… of sterf.
© Bester Meyer, 2022