My bed: Tracey Emin
Wat verklap die bed tog steeds
nie alles nie: kondome, merke,
bloedvloei, semen en die abjekte.
Dis ook die drankbottels wat opval
(glo vir vier dae lank net gedrink;
niks geëet op die rand van opgee
met wanhoop en pyn gerinkink).
Die honende kritici het dit afgemaak
as ‘n grap; miskien, miskien die speelgoed
en pantoffels misgekyk? Die swangerskaptoets?
Om vuil wasgoed openbaar te maak: ‘n fuck you –
veral as jy op dertien verkrag is,
dan klink handgrepe of lewe kuns naboots
so passé. Asof wonde in ‘n wasmasjien
soos sneeu se wit uitgewis kan word.
Die dubbel negatief ry jou bloots: witter as wat?
© Joan Hambidge, 2022