VRAAGTEKEN
Die kwik glip heen en weer
rondom normaal.
Per mond geneem
of in die loute van die lies
behou die pen sy tussenstand.
‘n Juiste lesing hang af van benadering:
styg en daal berus op aanblik
of die houding van ‘n hand.
Die silwer streep buig hom
om tot vraagteken
wat aanhou flikker in die glaskolom.
Dan liewer die byderwetse instrument
waar ‘n verligte syfer stilstaan
by die blitsbevinding van koors tot klop
afstandelik deur elektronika geklik.
Maar ‘n vraagteken meld hom aan
as senukronkel in die agterkop.
Twyfel bly al wat leesbaar is.
© Zandra Bezuidenhout
26 Sept 2022