Meiringspoort
Die poort lei jou binne,
terug na ʼn geboorte-
kanaal waar jou blik glip
oor boom en klip en dit
bevrug tot kransbonsai’s,
Mondrian-blokke
of hematietteëls in ʼn basiliek-
mosaïek; of het ʼn kleuter-
god hier Raponsie-torings
uit reuse LEGO opgebou,
poele vir meerminne uitgehou?
Jy tel die gestolde millennia
af soos die jaarringe
van gefossileerde bome
en word uiteindelik herbore
uit die buik van die berg
verby ‘n Karoo-venusheuwel:
‘n suigeling wat die aarde
vir die eerste keer sien.
© Franco Collin, 2022