Boekhou II
Ma doen maandeliks Pa se werkswinkelboeke,
haar regterhand bedryf bates, wins en krediete,
die linkerhand skryf in: laste, skuld en debiete.
Boekhou van die kwaad versier haar linkerskrif.
Toe die AVBOB-man haar hande oor haar borste vou,
vra hy: “Waaraan het jou ma so vasgeklou?”
Ek vind pa se werksgoed in die asblik:
die kasboek, die bankboek en die grootboek.
Uit blaaie waai nostalgiese geure van trekkers en ghries,
ek verhaal my ouers se verdriet uit olierige afdrukke:
daar talm Pa se voorvinger by ‘n rooi inskrywing
en hier druk sy halwe duim ‘n finale verslae klad:
die laaste item in die grootbroek, regs, is mý naam,
op dieselfde lyn, links, het Ma geskryf: “my man.”
© Martina Klopper, 2022