Skisofrenie
Sy hoor stemme praat
in eksaltasie en delirium
negatief, positief:
gedurig eggolalies in haar kop
die denkstoornisse hou nooit op
nie: iemand wat aanhoudend fluister
(Sint Catherine, Michael, Margaret)
konkretiseer, versper
vir goed of kwaad boikot
alle ander gedagtes
en sy moet akuut bly luister:
is dit werklik God?
Dit sleur haar mee
en Frankryk volg
om oorloë, veldslae te wen:
Orleans word bevry
en Karel is weer op die troon;
maar Parys het nog beset gebly;
en versetstemme word gehoor
om haar te arresteer, te beskuldig
oor mansklere wat sy dra
en al die stemme wat sy huldig.
Die hof het haar as heks, ketter, sedebreker
op ’n ark brandstapel-graf
vlammend die ewigheid in gestuur
tog het die pous haar later
as geheiligde sint Jeanne verklaar
en nou bly sy haar katatoniese geheime
in haar saligdom bewaar
© Meyer van Rensburg, 2023.