Die dood op ‘n ligter noot
Om die weg van sterfte self te kies
sou bepaald lei tot pandemonium.
Elkeen sou galant terugstaan
vir ‘n ander om eerste te gaan,
dan diep nadink oor die mees gepaste weg
verkieslik sonder pyn of ongerief:
beslis nie ‘n gewas in milt of pankreas,
ook nie ‘n dolk tussen ribbes of in die rug.
Plotseling gestuit deur beroerte of ‘n hartaanval
te melodramaties na my sin
en om aan ‘n gebroke hart of swaarmoedigheid
te gaan weier ek om vereers te dink.
Al wat my sou pas is om op honderd
en twintig jaar of wat, blakend gesond
sonder vriend of kind, uit eensaamheid
en verveling my oë te sluit, dan uit
moedswil verseg om dit weer oop te maak.
L’ envoi
Die hemel is ‘n plek waarheen ons almal aspireer
solank die vertrek daarheen net nie te gou gebeur.
© Hendrik J. Botha 2023
Briljant