Koronêre Angiogram
Doeke dek die pasiënt
steriel van toon tot nek,
elke vou of kreukel
presies plat getrek
met net ‘n kaal lies wat onder
kleurlose pleister loer:
hier – deur ‘n punksie in
die femorale arterie –
word oor ‘n draad kateters
na die linker en regter koronêre arteries
onderskeidelik gevoer;
eers slang die draad die spoor
in die aorta op,
styg en daal oor die boog,
vind die kateter
die koronêr se os of oog;
knaphand of masjien spuit jodium-vloeistof:
arteries op die skerm kleur,
word swart spinnekop-bene
wat bi- of trifurkeer;
x-straal oë bol om borskasdoeke
volg elke aar se loop
uit al die essensiële hoeke;
kundiges kry die laaste kyk:
sien hoe bloedvloei na die miokard
onbelemmerd mooi straal
of waar vernouings lelik
lewe in die hart laat daal.
© Salvia Ockhuis, 2023