Defibrilasie
Die monitor registreer
jou ventrikels wat fibrilleer:
daar’s chaos
in die onderste kamers van jou hart;
jy presenteer jou nood
met ‘n weet wat weg wei,
met jou asem wat stop,
met jou karotis wat nie klop
en onder jou vel sprei
die wit laken
van die wagtende dood –
oomblikke soos dié is fel,
dis hier waar elke sekonde
dreigend tel;
goddank!
net na die eerste skok geplant is
fladder jou oë weer oop,
begin kleur na jou periferie loop,
daag jou weet weer,
wys die monitor
die elektriese geleiding in jou hart
is gesinchroniseer;
jy is in sinus ritme.
Die defbrilator het weer
die wegsink van ‘n lewe
omgekeer.
©Salvia Ockhuis, 2023