Repliek op die voelisovering oor skisofrenie
Michel Foucault: …The object, that is, is to write … (a) history, …
of madness itself, before it has been captured by knowledge.
Geagte Voelisowe,
is skisofrenie ‘n vrug vir julle woordslaai?
Julle wil psigose proe voordat kennis
dit tem: ʼn argeologie van die waanstilte
eerder as begryp.
Skel my uit as modernisties
maar daar is geennesing in voelisoveer
deur un-PC-tralies van psigopatologie-
appropriasie nie.
Hierdie vloek:
is kanker van die siel, ‘n lewende doodsvonnis;
is beslis geen metaforiese fossiel of literêre teorie nie;
vertoon geen snars van kapitalisme of oedipale konflik nie.
Julle teoretiese deleuzies en hallusinasies betokkel nie die guattari;
voelisovering bring foucault teen die foltering van besetenheid.
Mag ek julle nooi, van agter
julle anti-strukturalistiese lessenaars
uit, na die kliniese slagveld waar ek julle
wil voorstel aan die seun oorkant
die tafelwoestyn: hy is nie stil nie, luister!
Hóór la folie, die kranksin in sy woorde,
die kakofonie van naels-op-swartbord.
Beleef die kannibalisme van chemie,
a brain without organs.
In die masjiien van die kliniek
lok ons eerder die seun uit die fiksie
van psigose, bring sy teks tot rede;
verwoord die logos van die psige se patos
met verskuns op voorskrifte,
molekules met metrum:
die poësie van medesyne,
lok la folie uit mutisme
van passiewe postmodernisme
ná die eufonie van leef-in-taal.
© Franco Colin, 2023