Sindroom X
Daar is niks wat die digter verhinder
om die psigiatrie poens te plunder nie:
Siteer soos ʼn man wat mal word die opwel
van ʼn baldadige, maniese voorspel.
Skisofrenie word bygehaal vir alles in
wat volksokkult en flenters is
en soos wat rampe realiteit verwring
word paniek tot vers gebring;
as dwangorde iemand domineer ̶
obsessies en kompulsies word geresiteer,
of lamenteer in poëtiese brabbeltaal
ʼn geheue wat klaaglik maar metries faal.
Net psigopate word by name aan die woord gestel:
mislukte metafore in ʼn reeksmoordhel.
© Franco Colin, 2023