Disritmie
Vir kardioloog, Dr. Hanneke Dannheimer
Wie kon weet?: Uit disritmie is poësie te maak.
Donderdagmiddag om presies twee minute
voor vyf begin my ribbekas hip-hop soos ʼn pulsar:
Danksy vierdejaar mediese onderrig diagnoseer jy
ʼn “onreëlmatige onreëlmatige” disritmie
as ATRIALE FIBRILLASIE. Die EKG vol lukrake
Mars-landskappieke bevestig die ongure vonnis.
In die intensiewe sorgeenheid
integreer jy met ʼn meganiese bed
en masjiene soos ʼn bemanningslid
van The Starship Enterprise gevange
geneem deur The Borg ̶ jy is nou ʼn kuborg
vol chemiese kure ingedrup deur buise
gekoppel aan jou sirkulasie,
die kranksinnige kloppe draadlangs
geprojekteer op polichrome skerms
wat atonaal piep en elke lyflike
parameter opdiep.
Nee wat! sê die empatiese kardioloog.
Ons kardioversie dié disritmie blitsig weg ̶
s.nw. word ww. ̶ klink soos ʼn gewelddadige
ommekeer van hartstog of rymelary uit die hart,
beslis ʼn elektrofisiologiese Star Trek-neutronbom
gevuur op ʼn vyandige spierpomp.
Narkose wis bewussyn …
… weer tot jou sinne kom:
pille betoom voortaan die alien-orgaan.
Verlig bemerk jy opnuut
die jambiese metrum
in jou bors en wonder:
Dokter, is daar dalk ook elektriese
inversie van ʼn gebroke hart
uit die disritmieë van die liefde?
© Franco Colin, 2023