Met Colas tussen die Bene
hoe pleit jy meneer Mashimane?
watter sê-woorde kan jy
bymekaar flans teen die klag
van dronk op straat?
in hierdie jaar van ons here 2023
vertoon die troon van die voorsittende beampte
– die prag-en-praal-wette van die deeltitelskema –
soos ʼn aanklag teen die alledag-mensedom
hý hier gedaag
om verantwoording te doen
vir die lot van baie ander soos hy
net ʼn ‘ja’ of ‘nee’ antwoord, meneer Mashimane:
jou oortredinge het jou ingehaal –
jou sê-woorde geweeg, jou mensehart
te lig bevind
daar word getuig van viktimisasie:
hoe die beskuldigde
rug teen die muur
vir ʼn sondaar uitgekryt is –
laat blaas het in die pypie
ná 18 jaar se lange diens:
se gesweet vir die lanies
wat soms ook maar dronk
in hul eenhede
gewag het op die son
as ʼn ma probeer vertel
hoe haar dogter laat weet het:
“maar mammie, wat doen hulle dan nou
met ou Richard?”
– tugtig die voorsittende verraad:
die getuienis is niks anders as hoorsê nie, prokureur Eier,
só asof ʼn woord gespreek in konfidensialiteit
tussen ʼn kind en haar moeder
nié die waarheid van die eeue omvat
nou sit ek en hy
met Mcdonald-colas tussen die bene:
die verhoor verdaag –
vir die eerste keer
gelyk voor die reg, voor God –
hy voel-voel na ʼn houertjie snuif
en ek self begerig die nikotienleegte
wat ek in ʼn vorige tyd oorwin het
sodat ek onskuldig kon pleit –
hy sê: God bless you, boss –
dankie met my hele hart –
you speak-a-the-law good, my boss:
met ek wat verduidelik dat daar meer intelligensie
in sy vredeliewende manier met die kinders van die kompleks is
en ek dink weer aan die vier wit oë
wat soos appeltjies na my toe aansweef
van agter die kas
van sy kubuskamer-woning –
hoe klein swart vuisies
teen myne druk
in ʼn groet van liefde, van verstaan,
dit terwyl ek en Richard
die laatnag-hoofweg van die stilte ondersoek:
elkeen oppad na ons kamers in die deel-titel-skema
én dis ʼn ongenaakbare god van menslike wette
wat op ons neerkyk
en die enigste genade wat daar nog oor is
óm nou en dan ʼn staaltjie te verruil, te lag
terwyl ons tot Maandag
vir die voorsittende beampte
se goed-beredeneerde verslag
moet wag
© Bester Meyer, 2023
Ek sit hier en lees en kry n knop in my keel en die trane lê vlak. Hoe regverdig mens die onreg? Met hateloosheid.