Brandwaglimfknoopbiopsie
dit is belangrik in die behandeling van borskanker
om te weet wat in die limfknope aangaan
die brandwaglimfknoop waar kankerselle eerstens
in sal dreineer is geëvalueer tydens my mastektomie
maar toe ek brandwag hoor, het ek gedink aan Hamlet
en die sneeuwind wat yskoud waai op die skansmure
van Elsinore-kasteel, waar die weer weggedraai het
van sy sorgvrye dae, en nou in veranderde lug, stink stik
van vuigheid, en hy verlang, o hy verlang, na sy goeie pa
tydens my mastektomie, met ‘n kerngeneeskundige tegniek
deur ‘n fyn naaldaspirasie, is limfnodeselle verkry vir ontleding
‘n week later sak ek ineen gestol waar al wat ek hoor
die harde voetstap van die patologieverslag was
okseldisseksie was die verwydering van ‘n blok weefsel
met nodes in die vetkussing waar senuweetjies toe sneuwel
ek was tog later skoon – skoon soos my lewe was in my gawe
stem, in die klank van my klavier met stemme wat sing in kirke
en daar was vrouens van tee en dose van dominees
kundig in die kuns van sny-kunde die goedheid van vol self
so irriterend dat ek aan wolke dink en tog pretensievol saam
dobber in lieflike musiek verbeelde realisme
maar die teepotte het geroes terwyl hulle gesmul het aan potjiekos
kīnnōrs het gekraak nadat ek Va Pensiero kon dirigeer
gemaalde Swarokski het ek seer afgesluk, my gorrelgat gesny
my stembande beseer, en ek kon nie daaroor kom nie
my maagensieme vernietig, in stukke gebrand, in stukke bolle bloed
in ‘n swart boek aborsie van suur skuim het dit begin
die uitskot van mense se drek in ontlasting
in die tydelike verligting wat dit bring
– nou – juffrou Annie sal nie kan kom nie
na daardie troues in daardie kirke van verwerping
so dryf uit, dryf stil uit, dryf, gly saam in stil wolke, gly
tot alles oor yonder sneeuberge in die yonder verdwyn
die kruipende verskyning van die openingsteks
die verdwynende dofwordende afsluitingsteks
dit gaan glad nie goed
met haar nie
© Annora Eksteen, 2023