Mastektomie
daarna, so lees ek nou, was dit net ‘n reeks X-straal-foto’s
dit kan ek so vaagweg onthou en ek lees van Wilhelm Konrad Röntgen
verdiep in sy proefneming, en dan – sy vrou se handskelet
Anna Bertha met ‘n ring van trou sigbaar en die kleur van vel val
net wit bene met ‘n ring aan ‘n vinger slank
die veerskag van ‘n gemartelde tortel dalk
diagnostiese X-beelde van my binnenste
dit kan ek onthou was skoon, maar my linkerbors
was te klein om te behou hulle sou dit volledig moes
amputeer terwyl ek uiteindelik wegsink in narkose
met die versekering van ‘n baie goeie prognose
‘n sny onder my bors, ‘n tweede een bo my tepel
en die vel wat oplig, borsweefsel met tumor verwyder
een litteken gelos met ‘n mooi resultaat
– asimmetrie val op in kuns – en in my niks spyt
oor ‘n verlore bors, het ek gedink
luisterend na ‘n Mahler simfonie, ‘n Sefier-verdrag
’n ooreenkoms in die verdeling van deursigtige orkestrasie
in sangvoëls se lieder hoor ek seisoenmodulasie
dan hier dan daar op takke gewaar langs ‘n berghut by ‘n meer
‘n klarinet koekoek vir ‘n cor anglais kristalfluit en skittertrompet
‘n sprankel van timpani’s smelt sneeu van die hoogste piek
en tjello’s dra sorgsaam die waterlyne rimpelend oor
na verglas vroegoggend lentelug
‘n kontrafagot wat net vrolik deur die lewe wou skyn
met bang lippe op dubbelblaaie van riete in tong artikulasie fyn
spreek aan: haar onbewuste pyn
diep in die manuskrip se orkeslaag op laag:
seksueel is ek lankal in ysmis
verdwyn
© Annora Eksteen, 2023