jan pierewiet
terwyl sy na die wekker tas
sug hy log langs haar
terwyl sy voete in pantoffels steek
snork hy met ontblote bors
terwyl sy kosblikke toedruk
skree hy vir sy koffie
terwyl sy kneusplekke toeverf, soen hy haar in die nek
as sy straataf loop
fluit hy deur die oop venster
as sy ekskuus tog vra
bly hy staan
en praat van haar sexy hol, haar tiete
sy konvergeer in sy geil oog
die wêreld word ‘n saamgestelde, geil oog
toe sy die hysbakknoppie druk
skuur sy hand teen haar heup
toe sy fakture uittik, kom die boodskap deur
hy soek haar ten duurste, hy soek haar goedkoop
toe sy nee sê, skryf hy dit neer
miskien moet sy nog vroeër opstaan vir sy koffie
of dalk ‘n kursus doen om beter te kook
miskien moet sy ‘n jas dra in die somer
of minder straataf loop
miskien moet sy hom aankla
maar wie sal haar glo as sy skuldig bevind word?
en wie sal haar glo dat ‘n vrou vir haar vryheid altyd betaal met verlies?
Franziska het gaan draf in Tokai
Uyinene het ‘n pakkie by die poskantoor gaan haal in Claremont
Aviwe Wellem het in Dutywa rys gekook
Anene Booysen was saam met haar boyfriend
die MeToo-beweging is net vir diesulkes
dink sy en gaan aan met haar lewe
#AmINext gebeur miskien môre
dink sy en loop met die straat af
maar terwyl sy haar verhoging vier, sien sy: haar manlike ondergeskikte grinnik
terwyl sy die verband teken, hoor sy: hy sit ‘n nuwe kombuis in
in haar eie kombuis op die Defy yskas
hang skuldige skedules van gesondheidskos vir haar gesin
in haar agterkop hang skuldige skedules van afstof
in haar dagboek is die skuldige skedules van vriendinne, werk en huwelike wat verpas is
die man wat oor haar heers
verrys uit die see
die een na wie sy hunker
is die bloed wat haar drinkwater kleur
sy verweer haar nie
teen hom wat glo hy mag
hom so vergryp aan mag
(Jesus het die Joodse vroue dogters
van Abraham genoem
– hul so tot gelyke status verhef)
sal haar beeld ooit mens genoeg word om hemelse oorloë te ontketen?
‘Klee haar met die son die maan pulsars en sterrestelsels
bou skuilings in die woestyn, bou skuilings vir haar kinders
gee haar vlerke, gee haar ‘n aarde wat sy mond oopmaak
en riviere insluk en slangkoppe vertrap
rig haar tempel weer op –
want sy is óók
‘n afstammeling van Abraham.’
© Marieta McGrath, 2023
(die hiefel en die fiefel, Antjie Krog, Verweerskrif, 2006: Kaapstad. Umuzi.)