Nuwe vers
Noudat jou jeug se oopgelate kring
voltooi is in die volheid van die wind;
sal jy in wasdom hierdie skemering
se koeltes in die teerder duister vind
en in jou silwer winterslaap volbring.
En jy wat in die stiltes skuiling soek
maar dan met kouer, hoër paaie reis
na herberge waar weinig ander gaan
met bloot vermoede van wat wag –
in die volkome beelt’nis van jou waan:
Neem hierdie grondelose vers en rus,
O jy wat vlam was en nog altyd brand
en brand en smeul; en brand en blus;
en êrens breek ’n brander aan die kus
van hierdie sluimerende droewe land.
Totdat die suiwer woorde jou ontwyk
van haat en hoop en stil geheimenis;
om al die edel en die kosbare te dra
deur skares; en deur bloue nagwake
waar daar nog onbevrugte verse is.
© Mellet Moll, 2023