Sehnsucht
Vir Nini: I’ll be seeing you in all the old familiar places.
Ek sou vir jou ’n vers wou skryf, beminde,
oor hoe ek jou in die lae mis herken
wat oor die Donau met die sonsopkoms
soos dooies uit die water kom.
Of hoe jou asem met die Alpynse wind
gaan slaap en jy soos die Lorelei uit
die Ryn se goue skoot verrys.
En ek sou soos Heinrich Heine of Sylvia
Plath vir jou vertel dat ek jou soos ’n sirene
in ’n ongebleikte son opsoek.
Die mitologie van liefhê is só onvolmaak
sonder jou rustelose kyk –
soos Dietrich of Garbo –
of dalk ’n monochrome film
van Leni Riefenstahl.
Die ars poëtika van die bodemlose
afgronde waarop jy rank,
jou naakte wortels oopgesprei en week,
wanneer ek saam met jou die nouskeur in
die onverkende berge klim
of langsaam tussen Wene of Berlyn
se keisteenstrate na mekaar
se ewebeelde soek.
Soos ek –
ek het jou telkens langs die stadspleine
en loopgange van ou Europa herontmoet.
© Mellet Moll, 2023