‘n Nag in die Kalahari
-The desert is a natural extension of the inner silence of the body
-Jean Baudrillard-
Langs ‘n hardekoolvuur besoek ek opnuut
ons kinderdae met broederskap skeefgetrap.
Verhoudings ontspoor deur verwagtinge,
veral deur vrees om feilbaar ontmasker
te moet staan, so leef ons elkeen apart
in ‘n opgemaakte wêreld, loop
ons eie spore mis en plaas mekaar
op ‘n altaar: die skaapram verstrengel
langs hierdie donker pad.
By ‘n vuur vergewe ek jou.
*
Net voor dagbreek maak ‘n bleeksingvalk
se roep my wakker, staan op en blaas
‘n vonk of twee uit gisteraand se as,
koester die vlammetjie bakhand met droë gras
en takkies tot nuwe vuur vir ‘n swartgebrande ketel
staangemaak op ‘n plat klip.
‘n Nuwe dag vir jou, dalk ook vir my.
© Hendrik J Botha, 08/2023
Uitstekende beskrywing Hendrik. Bereddering van skeefgetrapte verhoudings is waarskynlik een van die grootste uitdagings in die lewe.