Ligjaar
(Vir Nini)
Daar sal ’n eerbetoon deur bome wees
wat wagstaan in ’n onvoltooide kring
vir ons, die heemloses, wat agterbly.
Die wolke sal soos geeste in die skyn
van onbekende ligte oor ons vaar
na ander eindpunte wat stemloos roep.
Die wind sal sy bestemming êrens vind
en ons sal weerloos word in die gety
van stroomversnellings in ’n koel rivier.
En ek en jy sal die getuies wees
tussen die ander swane in die vloed
wat steeds die epigrawe bestudeer
van hopelose figurante stil
gebalsem in die opdrifsels om ons.
Maar luister fyn: die klankbaan sal
as etsings van ons asems in die lig
al swyend in die atmosfeer vergaan
tot net ’n swart-en-wit vergangenheid.
Maar ek sal nogtans wagstaan as ’n boom
omring deur elke onbegrensde jy.
© Mellet Moll, 2023