ecce homo
hoe mildelik na-aap ons God
in ons vooruitgang:
Kyk daar! die ystervoël,
bloot sjabloon, tog
word alle insittendes
inherent aanbiddenes:
soos die paartjie wat langs my
geKindle ‘n nuwe via mystica betrap
met hul stapskoene en engelse aksente;
of die oosterlinge skuinsvoor
(steeds gemasker)
wie se mala-krale raaklings
weggesteek word onder mou
saam met ‘n nuwer mantra;
of die enkel swart ma skuinsagter
wat twee stelle oorfone
tot stilte probeer paai
binne hierdie heiligdom
van die nuutste tabernakel;
ek besluit ek bid in my kop
want die interkom
verkondig steeds die ou veiligheidsmaatreëls…
Kyk hier! die mens,
bloot nabootsel van God!
© Floris van Zyl, 2023
Remember that the AVBOB Poetry Competition reopened on 1 August 2023. Visit our website regularly at https://www.avbobpoetry.co.za/ for editing tips and advice as well as updates about upcoming workshops.