Veiling
Daardie dag van die bankrotveiling,
daardie dag toe hulle die borde ingeslaan
het, dáárdie dag het Pretoria se rooigrond
bloed getrek. Die varings het in geel en bruin
getreur – en jy, langs jou rotstuin se ensemble
vetplante en plakkies. Die hotnosvy se koel stiltes;
die bitter krag van bossies tussen witgekalkte klip.
Fluorossente sproeiers in die somer, kringe rysmiere
om die straatlampe die dae wat verbydryf in wolke, hipnoties.
Jy moes verhuis. O slaap, die labirinte sluimer
van ’n skulp, die infiniteit van dagdrome, die poësie van ’n verlore
huis! Die kelder met sy rillende spinnekopdrade boesem nie meer
vrees in nie, die dromer rig die verbeelding om veilig te voel.
Daar is ’n dominante huis van verlies in ons wat nóg deur
stootskrapers, nóg deur vendusies, nóg deur die blinde vensters
van verdriet gewis kan word. Jy was nooit weg nie. Die geliefde
frustrasies – laaie briek in hul verslete spore; kasdeure kraak
as jy die sleutel draai en die versweë geur van parfuum boontoe
styg. Net goedheid en guns sal jou volg al die dae van jou lewe
en jy sal in die huis van Bachelard woon tot in lengte van dae.
© Nini Bennett, 2023
Remember that the AVBOB Poetry Competition reopened on 1 August 2023. Visit our website regularly at https://www.avbobpoetry.co.za/ for editing tips and advice as well as updates about upcoming workshops.
Die aanbieding wat sintuiglik praat! Die kleurvolheid van verdriet en magteloosheid, alles tref my hard as leser. Dis weerloos, Nini.
Mooi gedig! Veels geluk.