Bruilofsfees
‘n Klein onthaal in die hotel (waar ek
daagliks op onthou-se-spore terugstap),
wonder ek oor daardie man, ene Legio.
In kettings gebind was hy, volgens
die Groot Boek, naak in sy beseten-
heid, en later genees soos Jaïrus se kind.
Die bruilofsgangers uit die Kongo
groet my; onderbreek die gedig
oor wonderwerke, wyl hul water
in wyn verander, die digter nadink
oor al die weergawes van Die Evangelie
blou omkring in Lukas en Markus.
Die kinderhand wat toé in geloof,
‘n mosterdsaad, alles kon raaksien,
bring nou ‘n mirakel van hoop terug.
© Joan Hambidge, 2023