Soekenjin
Bibi Slippers
Soekenjin is ’n bundel oor begeerte, ‘n versameling verse oor die lewe in die tyd van die Internet van Dinge. Dit is gedigte oor die soeke na alles: liefde, die self, betekenis en die regte woord, en oor die sublieme en banale dinge wat ons as soekers vind. Die bundel ondersoek ook die vreemde afdraaipaadjies waarlangs ons nuuskierigheid, behoeftes en verslawings ons lei.
Hierdie eietydse bundel oorrompel die leser met verbindings – verbindings tussen mense en tussen derduisende onwaarskynlike onderwerpe. Die internet word ’n metafoor vir menswees en die soeke wat nooit afgeskakel kan word nie. Met haar vars hantering van ons ervarings van tegnologie, het Bibi Slippers ’n unieke plek in die Afrikaanse letterkunde.
Oor die skrywer:
Bibi Slippers is ’n kreatiewe praktisyn wat in verskeie dissiplines werk. Haar eerste digbundel Fotostaatmasjien (2016) is met vier literêre pryse bekroon. Sy is ook al as joernalis en kortverhaalskrywer met toekennings vereer, en het benoemings ontvang as draaiboekskrywer, TV-aanbieder en teatermaker.
[Tafelberg Uitgewers 2023. Prys: R290. Formaat: sagte band, 144pp. ISBN-13: 9780624093831]