Feestyd
Herinneringe aan ons vakansietyd: uit die Noorde
op pad na my oom en tante in die Strand;
ook na my Ouma Hannah in haar koel, stil huis.
Dan Stellenbosch toe waar my ouers die bakens
sou opsoek van hul eerste tydelike verblyf;
vandag ‘n lowergroen vier-ster boetiekhotel.
Die kamera met herinneringe flits: ‘n skynsel
oor al die kiekies van familielede reeds vort
(my oudste neef pas by hulle ingeboek).
Nou liasseer ek daardie vakansie-by-die-see
met my familie toe alles sober, stil, een-
duidig was iewers terug in Desember 1968.
Almal kon nog saamstaan in ‘n komvandaan
vóór geliefdes in die Huis van die Vader
hul plek sou inneem sonder ‘n son of see.
© Joan Hambidge