Dig met die voete
Hier sit ’n ware digter
voete in die water.
Ongehoorde woorde glip
soos skole paddavisse
verby sy rimpeltone.
Dan en wan word selfs ’n gladde,
(verbeel jou) vet platanna
’n oomblik stewig in
sy webspasies vasgevang.
Om so uur ná uur
langs die Olifantsrivier
te sit en paddavis,
hou die ou digter
waarlik op sy tone:
rym op rym
swem kleintyd verby,
dan êrens stroom-af
spring een of twee
knewels uigelate,
blinklyf uit die water …
om hopelik eendag voor
in die Oppermaanse koor
saam te kan kwaak
aan hemelse hosannas.
(Alle krokodille en seekoeie was buite sig
tydens die vervaardiging van hierdie gedig.)
© Hennie Nortje 2023. Noord van Malelane, Turksvy Publikasies
