Slaapsiek
Daar was die entjie paradys
wat ongestoord Volop kon bly heet,
maar weldra herdoop is tot Vlieg
want hier is weer eens spelbederf gepleeg:
van lekker kry kom lekker ly.
‘n Vliegie, geelbruin soos sy grond,
het hierdie keer die slang se rol geërf
met kennisgewing by die bewaakte poort:
Hierdie paradys is onder kwarantyn –
klop weer aan wanneer jy sterf.
Woorde het langs die pad verhard
soos met die natuur se slae
in donderweer en hael – die skuilings
onbewoonbaar kaal.
Enkele ligpunt is: Hoewel een klap werd,
is die tsetse-engel se vlerke sterk,
dra hulle met gemak
die parasiet van slaap.
© Pirow Bekker, 2024