Streeptrekkers
Moenie die vlakte-zebra vlak kyk nie:
Hierdie dier kan mens ‘n lelike streep trek;
daardie skoon-rond-van-die-vet-voorkoms
is bloot ’n vergisting, want dis niks anders
as gellings lug, opgehoop in die kolon.
Jy hoor ’n visarend roep.
Jy skakel die videokamera aan.
Hierdie ikoniese bostoneel
moet jy eenvoudig net, klank en al,
anderweek saamneem Kaap toe.
Maar dan gaan die trop streeptruie
in die voorgrond alte windmakerig
aan die galop.
Tuis gekom, is jou klankbaan
’n kakafonie van hoefslae en windgeraas.
En jou visarend is ge-mute.
© Hennie Nortje, 2023. Noord van Malelane, Turksvy Publikasies
