Kitskuur
facebook is jou handige instap kitshospitaal om die hoek
elke jan rap en sy vrou san se eie mediese woordeboek
wie het nog tyd vir wagkamers van veeartse en dokters
swel jou hond se knaters vra raad by jou facebookmaters
het jou baba koors en huil ure aaneen moenie verder soek
vergeet van spesialiste en interniste wat is tog die sin
as die dodelike virus ons tref is daar altyd ivermectin
wat weet navorsers tog van goggas wat uit sjina kom
dis ’n illuminati-komplot dink hulle regtig ons is dom
instemming tot inenting is tog suiwer selfvernietiging.
wroeg jy oor reïnkernasie of jou komende hartoperasie
slaan nie jou oë op na die berge om te vra vir hulp nie
kry by jou aanlyn-vriende ’n antwoord op elke kwelling
tussen dié kundiges kry jy veel meer as net een oplossing
bly kalm in tye van nood druk bloot jou facebookknoppie
© Hannes Visser, 2024