By die dood van woorde
ek wonder waar gaan gedigte heen
wanneer die woorde ingespit
soos saad
in die braakland val
groei dit soos blomme of bome
rank dit soos groente
of hang betekenis soos rooi appels in die boord
my oudste dogter is ‘n digter
op hoërskool
SA poetry society en ATKV
‘n boekie vol afrikaanse gedigte
geskryf en uitgeleen vir lees
ek wonder
waar gaan verlore gedigte heen
val dit soos sagte appelkose
tussen rommel tot pulp gekneus
of natgereënde blaaie
wat inkwoorde streeptraan vee
oor dooie wange
onbeloond
onbekroond
soos afval
in ‘n afvoersloot
© Margaret Cordier, 2024