As jy weg is
Vergewe my as ek my hart tussen hemel en aarde neerlê
op ‘n plek waar ek sonder woorde my sê kan sê,
waar ek nie nodig het om my trane ritmies af te vee
of my eindelose hartseer ‘n ander betekenis hoef te gee.
Dis juis daar waar my hartseer ook kan skaterlag
oor die simpel goed tussen my en jou elke dag,
dae wat ek nou koester soos grondboontjiebotter en stroop
tussendeur jou voetspore wat weg van my af loop.
Ek hoop nie jy gee om as ek sommer my hart daar vergeet,
dit sal makliker wees as ek nie die minute hoef te meet
tot ek weer jou diep stem fluister in my oor kan hoor
anders is elke dag net een waarin ek jou oor en oor verloor.
So, as jy weg is, weet maar ek gaan baie verdwaal en soek,
na antwoorde en liggings nog nie eers vasgepen in ‘n aardse boek.
Want as jy weg is sal die onthou vergeet, maar die vergeet onthou
my hart, my siel, my wese – is vir ewig vasgeplak aan jou…
© TC Boshoff, 2024