Sondagagtermiddag
Die week het gaan staan, met nagereg
vandag ingelegte perskes in jellie geset
sonder proe en proe se herkou
sal die hiernamaals so eindeloos wees
soos hierdie agtermiddag wat sy ure aflaai
nes die gaste wat grappies met baard uitpak
en wragtig nóg ’n spontane lag verwag
Sleep iets nog so droef verby
soos Sondagagtermiddag
op ’n stowwerige dorpie
die dag wanneer ons ironies
nagereg bedien;
sal ons die leisels maar laat skiet
en tyd soos sand deur ons vingers laat loop
Buite op die bank kyk ons lug in
wanneer gaan die valk duik
en iets gryp om te eet
maar hy draai en draai
die ure nek-om
vandag is hy kieskeurig
soek hy nagereg
dis Sondag
Ons staar oor die skemer
na die nag wat breek
om nog ’n onwrikbare week
van vooraf in te wag
en eet vanmiddag se leftovers
dis volgende Sondag dalk malvapoeding
© Anton Döckel, 2024