Ghobba
Die langbeenghaap, ook gedoop,
bobbejaanghaap.
Glo ‘n blaarlose vetplant
met vyfpuntige pieringvormige,
vleeskleurige, leeragtige blomme,
‘n ou huilhoed.
In soveel tale as wat ons wil,
in soveel tale wat ons droom,
word plante woorde
wat alles uitsonderlik skoon
verbeeld.
In my kombuiskas ‘n koppie
en piering met hierdie blomme
afgebeeld. Een koppie sonder oor,
‘n ander gesteel en uit die laaste een
drink ek smôrens bitter koffie
en verlang na jou
jeerlike vleeskleurige
ghobbatjie.
© Joan Hambidge, 2024
Joan, dankie vir hierdie heerlike gedig op Erfenisdag. Ons erfenis is in jou woorde so mooi! Jammer dis ‘n dag laat! – Marlies Taljard