Damaskus
I
Paulus, Apostel van die heidene,
laat ongeveer dertien briewe na
as eerste Christelike teoloog.
Augustinus, Luther en Karl Barth eer
hom. In Zwei Glaubensweisen
wys Martin Buber
op die skeiding tussen
die Jode- en Christendom:
toe Paulus die lydende Jesus
promoveer het: tot die lydende
Seun van God.
II
Sy briewe gelees sonder begrip
van ópofferinge, die basilieke
van Sint Pieter en Paulus bekyk,
toeristies met ‘n klein Kodak-kamera,
Instamatic, in my swaardbelynde hand.
Wetend nou: ‘n foto blote bargoenstaal.
Met kliekende vreemdelinge en ‘n gids
wat uitroep: stanno tutti bene!
Terug na Rome, verby die Tiber,
deur die Porta San Paolo in ‘n bus
lugverkoel met raserige reisgenote.
III
Moet terugkeer na die Via Ostiensi
(sonder kamera, notaboek of hoed)
die bloed sien én ruik op sy basiliek.
Dalk ook ‘n bedevaart van Antiochië, Perge,
Derbe tot in Jerusalem. En die plek vind
waar Ananias hom die hande opgelê
het tot waar hy onthoof is.
En verlede tyd het gebeur, promoveer
tot ‘n presens, nou. Wagtend
op iets buite woorde:
iets soos ‘n helder apparisie.
© Joan Hambidge