Kompas
Vanoggend eet ek oorskietkos met verwers in my studeerplek.
My hele huis omgedolwe met oop vensters en ‘n wind tierend,
wyl ek op my bed skryf met boeke na regs, WD Elements, ‘n bril
(sodat ek beter kan sien, my kind) en ‘n blikkie Doom vir grillige
insekte langs Deep Heat, Zam-Buk, Vaseline en Peaceful Sleep.
‘n Spinnekopbyt op my been, geswolle voet (goddank vir Tetanus)
stappend met ‘n wandelstok grimmig oor wat stafrym nou behels.
Ek rook nog ‘n Camel filter en bekyk die oorvol asbak langs my bed
allitererend vervaard oor spinnekop se swelling op syn Oedipus.
Kyk afgetrokke na die chaos soos in daardie tye van verhuising:
eers as kind en later toe jy my stiekem verlaat het vir ‘n ander bed.
Vanoggend dig ek met oorskietkos met verwers in my studeerplek.
© Joan Hambidge