Komponis
vlug streel haar vingers oor klawers in swart
en wit, in haar gees bruis ‘n melodie
diepe verlange ontspring in haar hart
dromend, borrelend tot ryk harmonie
eers sou haar potlood noukeurig van balk
tot balk spring op klippertjies soos strepies,
kwarttreëtjies, halwetreëtjies op klippies
soos strepies en sirkeltjies. Sy sou dalk
twyfel, uitvee en wanneer stilte haar
siel omvou sou sy in die taal wat almal
verstaan verder vertel van reuse, van ridders
wat drake verslaan, van dogtertjies
met vlegselhaartjies en seuntjies
met speelgoedswaardjies, van val
en opstaan en weer probeer
in die storie van ons wee bestaan
toon, noot en akkoord swel pianissimo
tot suiwer crescendo fortissimo
geheimenisse van ouds
ontsluit sy in sleutel-G
na ‘n wêreld ongeskaad
ritmies, liries
voer sy ons mee
© Stephan du Toit