Gekaapte stad
Martin Kruger
As argitek is Martin Kruger ’n takseerder van stede. In ’n eiesoortig digterlike taal gee hy sy indrukke van onder meer Kaapstad, Amsterdam, Parys, Barcelona, Venesië en New York. Almal is in ’n sekere sin gekaapte stede – deur kapitaliste, politici, ontwikkelaars en uiteraard ook argitekte. Hy toon besondere empatie met stedelike weeskinders – veral van Kaapstad, die sogenaamde Moederstad. Die bloudruk vir hierdie bundel is Italo Calvino se Le città invisibili (“Die onsigbare stede”). Gelukkig bied stede ook ruimte vir huislikheid en die liefde, dinge wat nie met die eerste oogopslag sigbaar is nie.
Beste Amsterdam
as dit reent, gragnat
en die wind jou sambreel laat flikflak
dan tier ek teen jou ou mure
hou my afrikaanse asem op vir jou taal
jou vriendelike blomme, kleurvol getooi
jou blinkswart geboue
wat sonder skroom die krulgewels
van kaapshollands naboots
miskien teen die vyftiende eeu
was instagram die tekenmooi soeweniers
van dapper kunstenaars, verkenners, reisigers
en derglik noodsaaklike raconteurs
Oor die outeur
Martin Kruger (1957) is ’n argitek, urbanis en kunstenaar wat in Kaapstad woon. Hy skryf al ’n geruime tyd gedigte, meestal vir homself. Hy lees dan die gedigte vir sy hond en sy geliefde en stuur dit per e-pos vir sy vriende en familie. Een van sy gedigte is opgeneem in die pandemiebloemlesing Maskers en mure (Turksvy, 2021).
[Turksvy Publikasies 2023. 84 bl. Prys: R300. ISBN: 978-0-7961-1421-1]