Mona Lisa
‘n rivier, ‘n kronkelpaadjie
‘n berg en ‘n brug in Florence
‘n droom…
van palet tot populierpaneel
in olie en pigment
is jy met presisie verbeel
laag op laag op laag
ragfyn
is jy gebore
jou kontoere
in rook en skadus verloor
lig wat dansend
glans, lok, bekoor…
versluierde haarlokke, handegevou
geen juwele en kleur
met jou oë op die horison
en ‘n driekwartdraai
glip jy deur
elke skrywershand
wat jou wil pen
skugter, speels, somber, subtiel,
skalks
glimlag jy vir die seun van Vinci
verwonderd
glimlag ons vir jou
© Stephan du Toit, 2024