Wat gaan aan in Pretoria?
Huisgenoot, 26 September 2024
Ek skryf ‘n somervers
om te onthou.
My pen se ink is ligte pers
soos Jakarandabome
in Oktober
langs Pretoria se strate
geplavei met studentedrome.
Ek onthou
vroegoggend sonskyn,
cumuluswolke wat laatmiddag bou
terwyl daglig kwyn,
swaar reëndruppels op ‘n koshuisdak,
weerligstrale en donderweer,
rye handboeke op ‘n rak,
heelnag studeer,
roomys by Milky Lane,
lafenis van samesyn
en ‘n ma wat bel
om te hoor wat haar kind vertel.
Ek skryf ‘n somervers
om te onthou
van lankal terug,
van my en jou
in die pers Jakarandastad…
© Andrea Sieberhagen, 2025