Joan Hambidge. Athol Harold Lannigan Fugard

 

Athol Harold Lannigan Fugard

 

(1932 – 2025)

 

Stem en teenstem: ‘n mini-drama

 

Helen Martins meen iets so

onbenulligs as ‘n voëlgesang

kan ‘n beeldjie inspireer.

Gistermiddag roep ‘n uiltjie

by my voordeur: so broos,

uit sy groen nessie geval.

Helen Martins meen iets so

beskeie as ‘n voëlgesang

kan ‘n reis na Mekka begin.

‘n Voorbode van jou dood,

by nabaat, toe ons verneem

van jou finale reis na Prawaas.

Helen Martins meen iets so

nutteloos as ‘n voëlgesang

kan borskanker dalk oorwin.

Meester van die tweegesprek

of selfontbloting, soos lesse

te lere uit bitter aalwyne.

Helen Martins meen iets so

gering as ‘n voëlgesang

kan die NG Kerk verjaag.

Jou beleef by ‘n kongres

sittend in ‘n rolstoel, laggend

toe ek uitroep: ”Meester, jy is befok.”

Helen Martins meen iets so

futiel as ‘n voëlgesang

kan blindheid dalk oorwin.

‘n Hallo en koebaai? ‘n Vertrek

nimmer as te nooit vir jou:

jy begryp alles rondom uilhuise.

Helen Martins verklap helaas niks

oor eindes of deure wat sluit;

daardie wyse uiltjie wis dit uit.

 

© Joan Hambidge, 2025