An Emperor on Avian Anatomy: Frederick II and De arte venandi cum avibus
The Veterinarian, Feb. 2025
(met apologie BB)
om ʼn gedig te skryf
is soos om met voëls om te gaan
om die penvere te pluk vir ink
en deur die donsvere die bibbervel te sny
om spier en bloedvat te ontbloot,
ʼn disseksie tot op die been –
skedel, wensbeen, humerus –
die femurskag te skik tot fluit
asof dit die sirinks self is
kyk die ertjiebrein wat van wolke droom
en toutjies trek langs stotterende werwels af
tot by die sitbeen, sakrum, stert
waar tussen oviduk en kloaak
uit slym en kalk ʼn god mirakels maak
of sprei die lyne wyer uit
van klavikel en skapula na vlerk
en rym die marionettemeganika
van veer en bloed tot vlíég
want om ʼn voël te skryf
is soos om van poësie om te kom
die veerpen soos ʼn dolk
deur die woord se hart gedryf.
© Ilse van Staden, 2025
Baie sterk gedig.