vestingverblyf langs die Ardèche
ons bly in ’n oënskynlik vervalle muur
van 100 meter dik met ’n poort as
toegang tot ’n Middeleeuse toring
& ’n Franse vlag bo-op ons skrop nes
binne-in ’n monument langs die Ardèche
in sy volle lengte van 500 meter
is enkele voordeure – die ander is
bínne die muur met kronkelstegies
soos in die gange van ’n miernes
ek loop op & af in vogtige straatjies
ruik die mos sien gekleure deure
elkeen uniek met ’n waterpomp of
klok of ’n uithanglantern ek hoor stilte
ek voel hoe tyd teruggly oor dik trappe
wat doodloop in toegemesselde deure
in ons klipnes sit ek op ’n vensterbank
muisstil & lees – skielik eensaam
dink ek terug aan vroue eeue gelede
wat gemeensaam hul wasgoed gewas
het in die fonteinbakke buite die poort
in ons nes van uitgemesselde rots
is dit snags aardedonker verlig ’n
kersie in ’n rooskwartsklip die toilet
soggens prisma die son deur loodglas
in die deur smidddags klim ons op
op na die toringsaal vir ’n piekniek
in die gras voer ons mekaar aarbeie
onder die vlag drink ons sjampanje
hier bo wen ons mekaar mieredronk
weer terug met koppe vol muisneste
© Carina van der Walt, 2025