Theresa Postma. Weskuskind

 

Weskuskind

 

Kind, ek plant vir jou fynbos en heide

om jou terug te bring na die skadukoelte

magrietjies, geelgombos en gonnas

met Kaapse wewers wat kirrrr,

ek gooi ʼn peulemat onder die groot ou boom

 

want té lank, kind, het steierende winde oor jou gewaai

het dorings in Middelpos se skoot gesweer;

verdriet lê bloedrooi kelke.

Pas op, more se tik en sade is nie eetbaar nie!

 

Watter woord sal die dooie vel voor ‘n ieder se oê wegskeur

en die Weskus son na binne laat

sodat óns kinders weer eens drome kan groei?

 

Kyk, daar waar die tarentaal dans op rooisand

stingel ʼn Maartlelie uit die aarde

één met die lig,

onskuld het ‘n naam

haar naam is Joslin Smith.

 

© Theresa Postma, 2025