Sy naam leef in klip
Paasnaweke was ons
by die kampterrein Betesda
buite Potchefstroom – my skoonpa
die sendeling en evangelis.
Die veld het wyd gelê.
Klip kan net klip, want
oral was sy teel
onderverdeel
tot stomme klippertjies,
Na die opstandingsdiens
het ieder en elk ’n gedenkklip opgetel
en dit in ‘n hoop gesit sodat
dit later op die sementmuurtjie
buite die saal vasgemessel kon word.
Elke paasfees se klipstapel staan
soos hopies hoop in ‘n ry.
Klip het lewend geraak en monde
gekry, want soos Hy
aan die Fariseërs gesê het:
As sy dissipels stilbly, sal
die klippe uitroep –
selfs al is hulle hulpeloos
in sement vasgeklem.
©Marthé McLoud, 2025
(Verwysing na DJ Opperman se gedig “Te klip om te boom”)