No need to be cuckoo to leap off the Alps
The Irish Independent, 28 Oktober 2006
Die gletserdorpie Saas-fee is ’n spikkel
aan die voet van die Dom en soos ’n koekoek
in die oomblik van gestolde horlosiewysers vasgevang.
Hier is voetgangers koning en motors verbode.
Die koningin van die berge het haar
skitterwit nagrok aan en onder
haar wollerige wolkpantoffels lê
die dorpie soos ’n goedbewaarde geheim.
Voor ons herberg wapper die Switserse vlag.
Dit lyk soos ‘n wit hospitaalkruis afgeëts teen bloed −
dalk ’n subtiele waarskuwing teen die afgronde
wat in die namiddaggloed op ons koms wag.
Vroegoggend ry ons met die skihyser
berg-op. Die son is ’n flits en laat die diep valleie
bewe met lig. Heen en weer
word die skaduryke dieptes verlig.
Ons loop stadig bo-op die berg rond
met dun lug in ons longe en verkyk ons
aan die kranse wat nes katedrale
hemelwaarts toring opsoek na God.
Laatmiddag, met die afsak na onder,
hang ons soos ’n wal sneeu oor ’n afgrond
aan die vingerpunte van die ewigheid:
koekoekversteen in die oomblik.
© Marthé McLoud, 2025